અમિત ખુંટ આપઘાત કેસનો આરોપી રાજદીપસિંહ જાડેજા જૂનાગઢ જેલ હવાલે આ કેસમાં વધુ એક ફરાર આરોપીની શોધખોળ હાથ ધરી છે

ગોંડલ, તા.13: રીબડાના ચર્ચિત બનેલા અમિત ખુંટ આપઘાત પ્રકરણમાં મુખ્ય આરોપી પૈકીનાં રીબડાનાં રાજદિપસિંહ અનિરૂદ્ધસિંહ જાડેજા બનાવનાં છ મહિના ફરાર રહ્યા બાદ સોમવારે રાત્રે ગોંડલ તાલુકા પોલીસમાં સરેન્ડર થતા પોલીસે તેની ધરપકડ કરી કાર્યવાહી હાથ ધરી રિમાન્ડ માટે કોર્ટમાં રજુ કરાતા કોર્ટ દ્વારા બે દિવસનાં રિમાન્ડ મંજુર કરાયા હતા. રિમાન્ડ આજે પુરા તથા કોર્ટમાં રજુ કરતા રાજદિપસિંહે રિબડા પેટ્રોલ પંપ ઉપર ફાયરીંગ કરનારા એક આરોપી ગોંડલ સબજેલમાં હોય પોતાને જાન ઉપર જોખમ હોવાથી જૂનાગઢ જેલમાં મોકલવા લેખીત રજુઆત કરી હતી. જે ધ્યાને લઈ કોર્ટે રાજદિપસિંહને જૂનાગઢ જેલ હવાલે કરતો હુકમ કરતા પોલીસે તેને જૂનાગઢ જેલ હવાલે કર્યા હતા.

રીબડા રહેતા અમિત દામજીભાઈ ખુટે તા.પ/પનાં પોતાની વાડીએ ગળાફાંસો ખાઈ આપઘાત કર્યો હતો. અમિતે લખેલી સ્યૂસાઈડ નોટમાં પોતાને ખોટી રીતે હનીટ્રેપમાં ફસાવી મરવા મજબુર કરવા અંગે અનિરૂદ્ધસિંહ મહિપતસિંહ જાડેજા તથા તેના પુત્ર રાજદિપસિંહ સહિતનાં નામ લખ્યા હોય તાલુકા પોલીસે ગુન્હો નોંધી તપાસ હાથ ધરી હતી. દરમ્યાન અનિરૂદ્ધસિંહ તથા રાજદિપસિંહ ફરાર થઈ ગયા હતા. એક દોઢ માસ પહેલા આ બનાવમાં અનિરૂદ્ધસિંહ કોર્ટમાં સરેન્ડર થતા પોલીસે તેનો કબજો સંભાળી રિમાન્ડ સહિતની કાર્યવાહી બાદ જેલ હવાલે કરાયા હતા. દરમ્યાન પોલીસ ફરિયાદનાં છ મહીના બાદ સોમવાર રાત્રે રાજદિપસિંહ તાલુકા પોલીસમાં સરેન્ડર થયા હતા. અમિત ખુંટ આપઘાત પ્રકરણમાં પોલીસ ફરિયાદ થયા બાદ રાજદિપસિંહે ગોંડલ સેશન્સ કોર્ટ, હાઈકોર્ટ તથા સુપ્રીમ કોર્ટમાં આગોતરા જામીન માટેની અરજી કરી હતી પરંતુ કોર્ટમાં આગોતરા જામીન નામંજુર થયા હતા. આખરે તાલુકા પોલીસમાં સરેન્ડર થયા હતા. આ ચકચારી કેસનો અન્ય આરોપી રહીમ મકરાણી નાસતો ફરતો હોય હજુ સુધી પોલીસ પક્કડથી દૂર છે.