તાલાલાનાં
આંકોલવાડી ગીર ગામે ઈકો ઝોનમાં સમાવેશ : 24 ગામના સરપંચોની બેઠક યોજાઇ
ઈકોઝોનમાં
સમાવિષ્ટ 3 જિલ્લાના 196 ગામના સરપંચો અને સભ્યોની વિસાવદરમાં યોજાનાર મહાપંચાયતને
સમર્થન આપતો ઠરાવ થયો
તાલાલા,
તા.29 : તાલાલા પંથકમાં ઈકો ઝોનમાં સમાવેશ 24 ગામના સરપંચો, ઉપસરપંચો, પૂર્વ સરપંચો
તથા ગ્રામ પંચાયતના સભ્યોની અગત્યની બેઠક આંકોલવાડી ગીર ગામે ઈકો ઝોન લડત સમિતિના અગ્રણી
વિશાલભાઈ વસોયા(સુરત)નાં અધ્યક્ષ સ્થાને યોજાઈ હતી. જેમાં ઈકો ઝોનનો કાળો કાયદો રદ
કરાવવા હવે સુપ્રિમ કોર્ટમાં અપીલ દાખલ કરીને કાનૂની લડત શરૂ કરવાનો નિર્ણય લેવાયો
હતો.
પ્રજા
તથા કિસાનો માટે આફતરૂપ ઈકો સેન્સિટીવ ઝોનનો કાળો કાયદો રદ કરવા સુપ્રિમ કોર્ટમાં અપીલ
દાખલ કરી કાનૂની લડત શરૂ કરવા બેઠકમાં સર્વાનુમતે નિર્ણય કરવામાં આવ્યો હતો. આ માટે
ગીર સોમનાથ, જુનાગઢ અને અમરેલી ત્રણ જિલ્લાના ઈકો ઝોનમાં સમાવેશ 196 ગામના સરપંચ, ઉપસરપંચ
તથા ગ્રામ પંચાયતના સભ્યોની આગામી દિવસોમાં વિસાવદર ખાતે રાજ્યમાં પ્રથમ વખત યોજાનાર
મહાપંચાયતનાં આયોજનને સંપૂર્ણ સમર્થન આપતો ઠરાવ કરવામાં આવ્યો હતો.
વિસાવદર
ખાતેની મહાપંચાયત સંપૂર્ણ બિનરાજકીય અને સરપંચોની આગેવાની હેઠળ યોજાશે. મહાપંચાયતના
સ્ટેજ ઉપર એક પણ પક્ષના રાજકીય અગ્રણીને સ્થાન આપવામાં આવશે નહીં તેમ બેઠકના અધ્યક્ષ
સ્થાને સંબોધન દરમિયાન વિશાલ વસોયાએ જણાવ્યું હતું. વિનાશકારી ઈકો સેન્સિટીવ ઝોનનાં
કાળા કાયદાથી ઘણા ગામના લોકો હજુ અજાણ છે,
માટે આવી રહેલા ઈકો સેન્સિટીવ ઝોનનાં આફતરૂપ કાળા કાયદાથી લોકોને અવગત કરી 196 ગામોમાં
લોક જાગૃતિ ઉભી કરવા આગામી દિવસોમાં લોક જાગૃતિ રથ પરીભ્રમણ કરશે. કાળો કાયદો સંપૂર્ણ
રદ કરવા 196 ગ્રામ પંચાયતો દ્વારા સુપ્રીમ કોર્ટમાં સામૂહિક અપીલ દાખલ કરી કાયદાકીય
લડત શરૂ કરવામાં આવશે.
