કપ્તાન
હાર્દિકની વાપસીથી MIની
બોલિંગ-બેટિંગ મજબૂત બનશે : સિરાજનું ખરાબ ફોર્મ GT માટે ચિંતાનો વિષય
અમદાવાદ,
તા.28: કપ્તાન હાર્દિક પંડયાની એક મેચના પ્રતિબંધ બાદ વાપસી થશે, ત્યારે તેની ટીમ શનિવારે
રમાનાર મેચમાં ગુજરાત ટાઇટન્સ વિરુદ્ધ જીતના મકકમ ઇરાદા સાથે ઉતરશે. બીજી તરફ ગુજરાત
ટાઈટન્સની નજર પહેલા મેચની હાર ભૂલીને સીઝનની પ્રથમ જીત હોમ ગ્રાઉન્ડ પર મેળવવાની હશે.
બન્ને ટીમને સીઝનની પ્રથમ જીતની તલાશ છે. મુંબઇ ટીમ તેનો સીઝનનો પહેલો મેચ હારવાનો
ક્રમ તોડી શકી ન હતી અને સીએસકે સામે હારી હતી. તો ગુજરાતે મોટા સ્કોરવાળા મેચમાં પંજાબ
સામે 11 રને હાર સહન કરી હતી.
મુંબઇ
ઇન્ડિયન્સ ટીમને પહેલા અને બીજા મેચ વચ્ચે લગભગ એક સપ્તાહનો સમય મળ્યો હતો. આ દરમિયાન
તેના ખેલાડીઓ જામનગર સ્થિત રિલાયન્સના વનતારા પહોંચ્યા હતા. અહીં એમઆઇના ખેલાડીઓ પ્રાણીઓની
હાજરીમાં બૂટ કેમ્પ યોજાયો હતો. આ પછી મુંબઇ પહોંચી બે દિવસ સખન નેટ પ્રેક્ટિસ કરી
છે. ટીમનો નિયમિત સુકાની અને સ્ટાર ઓલરાઉન્ડર હાર્દિક પંડયા વાપસી કરશે આથી મુંબઇની
બેટિંગ-બોલિંગને બળ મળશે. જો કે બુમરાહની ખોટ પૂરી શકે તેવો કોઇ બોલર મુંબઇ પાસે નથી.
મુંબઇ
ટીમે શનિવારનો મેચ નરેન્દ્ર મોદી સ્ટેડિયમ પર રમવાનો છે જ્યાં પરિસ્થિતિ પૂરી રીતે
બેટધરોને અનુકૂળ છે. આ મેદાન પર પંજાબના 243 રન સામે ગુજરાતના 232 રન થયા હતા. એક મેચમાં
47પ રન બન્યા હતા. હવે અહીં સીઝનનો બીજો મેચ રમાશે અને ફરી રનના ઢગલા થશે તેવી પૂરી
સંભાવના છે. ગુજરાત માટે મોહમ્મદ સિરાજનું પ્રદર્શન મહત્ત્વનું બની રહેશે. તેણે પંજાબ
સામે પ4 રન લૂંટાવ્યા હતા. પ્રસિદ્ધ કૃષ્ણા પણ પ્રભાવ છોડી શક્યો ન હતો. જે જીટીના
હેડ કોચ આશિષ નેહરા માટે ચિંતાનો વિષય છે. બે વિદેશી બોલર રબાડા અને રાશિદ ખાન પણ પંજાબની
રન ગતિ પર અંકુશ મૂકી શક્યા ન હતા. મુંબઇ સામે ગુજરાતના બોલરોએ સામૂહિક સારો દેખાવ
કરવો પડશે.
મુંબઇના
નવા સ્પિનર વિગ્નેશ પુથુરે સીએસકેની સ્પિન ફ્રેન્ડલી પીચ પર પ્રભાવશાળી દેખાવ કર્યો
હતો, તેની અસલી પરીક્ષા અમદાવાદની બેટિંગ પીચ પર થશે. મુંબઇના સ્ટાર ખેલાડીઓ રોહિત
શર્મા, સૂર્યકુમાર યાદવ અને તિલક વર્માનો દેખાવ ટીમ માટે મહત્વપૂર્ણ બની રહેશે. બીજી
તરફ ગુજરાતને તેના કપ્તાન શુભમન ગિલ પાસેથી સારી શરૂઆતની આશા રહેશે.
