-પાંચ મહિના પહેલાં સ્પેસશિપની ચિપમાં સમસ્યા આવી હતી; 46 વર્ષ પહેલાં લોન્ચ થયું હતું
વાશિંગ્ટન, તા.24: અમેરિકન સ્પેસ એજન્સી નાસાના અવકાશયાન વોયેજર-1એ 24 અબજ કિલોમીટર દૂરથી સિગ્નલ મોકલ્યા છે. છેલ્લા 5 મહિનામાં આ પ્રથમ વખત છે જ્યારે વોયેજરે સંદેશ મોકલ્યો છે અને નાસાના એન્જિનિયરો તેને વાંચવામાં સફળ રહ્યા છે. વોયેજર 1ને વર્ષ 1977માં અવકાશમાં મોકલવામાં આવ્યું હતું. આ માનવ દ્વારા બનાવેલ અવકાશયાન છે જે અવકાશમાં સૌથી દૂરના અંતરે હાજર છે.
આ અવકાશયાન ગયા વર્ષે 14 નવેમ્બરથી સિગ્નલ મોકલવાનું બંધ કરી દીધું હતું. જો કે, તેને પૃથ્વી પરથી મોકલવામાં આવેલા આદેશો મળતા હતા. વાસ્તવમાં, ડેટા એકત્રિત કરવા અને તેને પૃથ્વી પર મોકલવા માટે જવાબદાર અવકાશયાનની ફ્લાઇટ ડેટા સિસ્ટમ લૂપમાં અટવાઈ ગઈ હતી.
માર્ચમાં, નાસાની ટીમે શોધ્યું હતું કે અવકાશયાન પરની એક ચિપ ખરાબ થઈ ગઈ હતી, જેના કારણે 3% ડેટા સિસ્ટમ મેમરી બગડી ગઈ હતી. આ કારણોસર સ્પેસશિપ કોઈપણ વાંચી શકાય તેવા સંકેત મોકલવામાં સક્ષમ ન હતું. આ પછી વૈજ્ઞાનિકોએ કાડિંગ દ્વારા ચિપને ઠીક કરી.
વોયેજર દ્વારા 20 એપ્રિલે મોકલવામાં આવેલા સિગ્નલમાં તેણે તેના સ્વાસ્થ્ય અને સ્ટેટસ અપડેટ આપ્યા છે. નાસાના જણાવ્યા અનુસાર, આગળનું પગલું અવકાશયાનમાંથી વિજ્ઞાન ડેટા મેળવવાનું છે.
