જેતપુરના ચામુંડાનગરમાં દારુના અડ્ડા ઉપર સતત બીજા દિવસે મહિલાઓની રેડ જો પોલીસ નહીં સાંભળે તો ગાંધીનગર સુધી જઈશું: રોષે ભરાયેલી મહિલાઓની ચીમકી

 જેતપુર, તા.2: જેતપુરના ધોરાજી રોડ પર આવેલા ચામુંડાનગરમાં દેશી દારૂના દૂષણને ડામવામાં પોલીસ નિષ્ફળ નીવડતા આખરે મહિલાઓએ કાયદો હાથમાં લીધો છે. સ્થાનિક મહિલાઓએ સતત બીજા દિવસે રણચંડી બનીને દારૂના અડ્ડા પર જનતા રેડ કરતા પોલીસ બેડામાં દોડધામ મચી ગઈ છે.

બનાવની વિગત મુજબ, ચામુંડાનગર વિસ્તારમાં છેલ્લા ઘણા સમયથી દેશી દારૂનું વેચાણ ધમધમી રહ્યું છે. ગઈકાલે પણ અહીંની જાગૃત મહિલાઓએ એકત્ર થઈને જનતા રેડ કરી હતી અને પોલીસને જાણ કરી હતી. જોકે, સ્થાનિક મહિલા શિલ્પાબેન રાજપરાના જણાવ્યા મુજબ, પોલીસ ગઈકાલે આરોપીને લઈ ગઈ હતી. પરંતુ માત્ર અડધી કલાકમાં જ તેને છોડી મુક્યો હતો. જે બાદ સાંજે ફરીથી દારૂનું વેચાણ શરૂ થઈ ગયું હતું.

અન્ય એક સ્થાનિક મહિલા નીતાબેન રાજપરાએ જણાવ્યું હતું કે, અમે પોલીસ, મામલતદાર અને આગેવાનોને અનેકવાર રજૂઆતો કરી છે, પરંતુ કોઈ પરિણામ આવતું નથી. અમારા વિસ્તારમાં દારૂડિયાઓ રસ્તા પર ઉભા રહીને પીએ છે, જેના કારણે અમારી જુવાન દીકરીઓનું ઘરની બહાર નીકળવું મુશ્કેલ બન્યું છે. પોલીસની કામગીરીથી અકળાયેલી મહિલાઓએ આજે બીજા દિવસે પણ દારૂના અડ્ડા પર દરોડો પાડયો હતો. જેમાં દારૂ અને હથિયારો પણ મળી આવ્યા હોવાનો દાવો કર્યો છે. રોષે ભરાયેલી મહિલાઓએ ચીમકી ઉચ્ચારી છે કે જો સ્થાનિક પોલીસ કાર્યવાહી નહીં કરે તો તેઓ રાજકોટ એસ.પી. અને ગાંધીનગર સુધી રજૂઆત કરવા જશે. હાલ તો જેતપુર પોલીસની કામગીરી સામે અનેક સવાલો ઉભા થયા છે.

પોલીસ અડધી કલાકમાં છોડી મુકે, સાંજે ફરી ધંધો શરૂ !

મહિલાઓએ આક્રોશ વ્યક્ત કરતા કહ્યું હતું કે, અમે પાંચ વર્ષથી ફરિયાદો કરીએ છીએ. ગઈકાલે રેડ કરી તો પોલીસ આરોપીને લઈ ગઈ અને અડધી કલાકમાં પાછો મોકલી દીધો. છૂટીને આવેલા બુટલેગરે વિસ્તારમાં દાદાગીરી કરી મહિલાઓને કહ્યું હતું કે, તમારું ખૂન કરી નાખીશું. શું જેતપુર પોલીસ બુટલેગરો સામે લાચાર છે કે પછી તેમની મીઠી નજર છે? તેવો સવાલ લોકમુખે ચર્ચાઈ રહ્યો છે.