આજે ભારત પહોંચશે રશિયન રાષ્ટ્રપતિ પુતિન

-30 કલાકના પ્રવાસ માટે દિલ્હી હાઇ સિક્યોરિટી ઝોનમાં તબદીલ : પાંચમીએ મોદી-પુતિન વચ્ચે 23મી શિખર બેઠક

-ભારત-રૂસ વચ્ચે મોટી સૈન્ય સમજૂતી, એક-બીજાના સૈન્ય બેઝનો ઉપયોગ કરી શકશે: રૂસી સંસદની મંજૂરી

 નવી દિલ્હી, તા. 3 : રશિયાના રાષ્ટ્રપતિ વ્લાદિમીર પુતિનની ભારત યાત્રા આવતીકાલથી શરૂ થવાની છે. પુતિન આ યાત્રા દરમિયાન ઘણી સૈન્ય સમજૂતી કરી શકે છે. રશિયાના નિચલા સદન ડયૂમાએ ભારત અને રશિયા વચ્ચે સૈન્ય સમજૂતીઓને મંજૂરી આપી છે. રશિયાના રાષ્ટ્રપતિ પુતિન 130 સભ્યના પ્રતિનિધિમંડળ સાથે ભારત પહોંચવાના છે. જેના માટે દિલ્હીને હાઈ સિક્યોરિટી ઝોન બનાવવામાં આવ્યો છે. પુતિનની સુરક્ષા માટેની એક ટીમ અગાઉ જ દિલ્હી પહોંચી ચૂકી છે.

રૂસના રાષ્ટ્રપતિ વ્લાદીમીર પુતિન આવતીકાલે ભારત આવી રહ્યા છે તે પૂર્વે રૂસની સંસદના નીચલા ગૃહે ભારત અને રૂસ વચ્ચેની સૈન્ય સમજૂતી ‘રેલોસ’ને મંજૂરી આપી હતી. આ સમજૂતી હેઠળ બંને દેશ એક-બીજાના સૈન્ય બેઝ, સુવિધાઓ અને સંસાધનોનો ઉપયોગ અને આદાન-પ્રદાન કરી શકશે.

આ સમજૂતી આ વર્ષે 18મી ફેબ્રુઆરીના ભારત અને રૂસ વચ્ચે કરવામાં આવી હતી. ગયા સપ્તાહે રૂસના વડાપ્રધાન મિખાઈલ મિશુસ્તિને તેને સંસદની મંજૂરી માટે મોકલી હતી.

રૂસી સંસદના સ્પીકરે જણાવ્યું હતું કે ભારત અને રશિયાના સંબંધો બેહદ મજબૂત છે અને આ સમજૂતી સંબંધોને વધુ સુદ્રઢ બનાવશે.

પુતિન ગુરુવારે સાંજે છ વાગ્યા આસપાસ દિલ્હી પહોંચી શકે છે. રાત્રે પીએમ મોદી સાથે સાત લોક કલ્યાણ માર્ગે ડિનર કરશે. બાદમાં સવારે નવ વાગ્યે રાષ્ટ્રપતિ ભવનમાં પુતિનનું ઔપચારિક સ્વાગત કરવામાં આવશે. પુતિનને ગાર્ડ ઓફ ઓનર આપવામાં આવશે. બાદમાં તેઓ 10 વાગ્યે રાજઘાટ જઈને મહાત્મા ગાંધીને શ્રદ્ધાંજલિ આપશે. 11 વાગ્યે પુતિન અને પીએમ મોદી વચ્ચે હૈદરાબાદ હાઉસમાં 23મી શિખર બેઠક થવાની છે. આ બેઠક દરમિયાન  કારોબાર, ટેકનિક, અંતરિક્ષ, સામરિક સહયોગ સહિતના અલગ અલગ મુદ્દે વાતચીત થશે. માનવામાં આવે છે કે પુતિનની ભારત મુલાકાત દરમિયાન મહત્ત્વની ઘોષણાઓ થઈ શકે છે. બાદમાં બન્ને નેતા સંયુક્ત નિવેદન પણ જારી કરશે.

પીએમ મોદી અને પુતિન ભારત-રશિયન બિઝનેસ ફોરમને સંબોધિત કરવાનો કાર્યક્રમ છે. રાષ્ટ્રપતિ દ્રૌપદી મુર્મૂ પુતિનનાં સન્માનમાં પાંચમી ડિસેમ્બરના સાંજે ડિનરની મેજબાની કરશે. બાદમાં પુતિન ભારતથી પરત ફરશે. 4-5 ડિસેમ્બરના થનારા આ પ્રવાસ માટે દિલ્હીને કિલ્લામાં તબદીલ કરવામાં આવ્યું છે. લગભગ 130 સભ્યનું રશિયન પ્રતિનિધિમંડળ પુતિનની સાથે આવવાનું છે.

પુતિનના પ્રવાસ માટે દિલ્હીને હાઇ સિક્યોરિટી ઝોન બનાવવામાં આવ્યો છે. રશિયાની એડવાન્સ સિક્યોરિટી ટીમના 50થી વધારે સભ્યો પહેલા જ દિલ્હી પહોંચી ચૂક્યા છે. આ ઉપરાંત દિલ્હી પોલીસ, સેન્ટ્રલ સિક્યોરિટી, પેરામિલિટ્રી અને એનએસજી કમાન્ડો મુખ્ય ભૂમિકા ભજવશે. સુરક્ષામાં ટેક્નોલોજીની ભૂમિકા પણ મહત્ત્વની રહેશે. જેમાં ડ્રોન, સીસીટીવી અને એન્ટી ડ્રોન ગન્સ વગેરે સામેલ છે.