પહાડથી લઈને મેદાન સુધી વરસાદનો કહેર

- ઉત્તરાખંડમાં રેડએલર્ટ ઃ ઓરિસ્સા, બિહારમાં પૂરનો ખતરો ઃ યુપીનાં અનેક જિલ્લાઓમાં શાળાઓ બંધ ઃ હજી ત્રણ દિવસ સુધી ભારે વરસાદનું જોખમ

નવી દિલ્હી, તા. 2પઃ દેશના અનેક ભાગોમાં સપ્ટેમ્બરના અંતમાં ફરી એકવાર વરસાદે જોર વધારીને મુશ્કેલીઓ ઉભી કરી નાખી છે. ઉત્તર પ્રદેશ, ઉત્તરાખંડથી લઈને ઓડિશા, છત્તીસગઢ, ઝારખંડ, પશ્ચિમ બંગાળ અને બિહાર સુધી ભારે વરસાદને કારણે પૂર અને ભૂસ્ખલનનો ખતરો વધી ગયો છે. અનેક સ્થળોએ નદીઓમાં પૂર આવ્યું છે, રસ્તાઓ બંધ થઈ ગયા છે અને નીચાણવાળા વિસ્તારોમાં રહેતા લોકોને સુરક્ષિત સ્થળોએ જવાની સલાહ આપવામાં આવી છે. આ ઉપરાંત, અનેક રાજ્યોમાં એલર્ટને પગલે શાળાઓ બંધ રાખવાની જાહેરાત કરવામાં આવી છે.

હવામાન વિભાગના જણાવ્યા અનુસાર, ઉત્તર તટીય આંધ્ર પ્રદેશ અને દક્ષિણ ઓડિશા નજીક બંગાળની ખાડીમાં બનેલું ડીપ ડિપ્રેશન જ દેશના અનેક રાજ્યોમાં હવામાનમાં આવેલા ફેરફાર માટે જવાબદાર છે. આ ડીપ ડિપ્રેશન ઉત્તર-પશ્ચિમ દિશામાં આગળ વધી રહ્યું છે અને નબળું પડીને 26 સપ્ટેમ્બરની બપોર સુધીમાં પૂર્વ મધ્ય પ્રદેશ અને આસપાસના વિસ્તારોમાં પહોંચી શકે છે. ત્યારબાદ આ સિસ્ટમનો બાકી રહેલો લો-પ્રેશર વિસ્તાર ઉત્તર પ્રદેશ તરફ આગળ વધશે. તેની અસરને કારણે પૂર્વી ઉત્તર પ્રદેશ, બિહાર અને પશ્ચિમ ઉત્તર પ્રદેશમાં વરસાદ વધવાની શક્યતા છે.

વહીવટીતંત્રે નદી કિનારે અને નીચાણવાળા વિસ્તારોમાં રહેતા લોકોને સાવચેત રહેવાની અપીલ કરી છે. સતત વરસાદ અને વધતા જળસ્તરને ધ્યાનમાં રાખીને રાહત અને બચાવ ટીમોને પણ એલર્ટ પર રાખવામાં આવી છે.

હવામાન વિભાગના જણાવ્યા અનુસાર, આગામી ત્રણ દિવસ દરમિયાન પશ્ચિમ ઉત્તર પ્રદેશમાં પણ ભારે વરસાદ પડી શકે છે. વરસાદના એલર્ટને ધ્યાનમાં રાખીને અનેક જિલ્લાઓમાં શાળાઓ બંધ રાખવાનો નિર્ણય લેવામાં આવ્યો છે.

મધ્ય પ્રદેશમાં પણ વરસાદનો સિલસિલો ચાલુ રહેવાની શક્યતા છે. પૂર્વ મધ્ય પ્રદેશમાં 25 અને 26 સપ્ટેમ્બરે અતિભારે વરસાદની શક્યતા છે, જ્યારે પશ્ચિમ મધ્ય પ્રદેશમાં 26 સપ્ટેમ્બરે અતિભારે વરસાદ પડી શકે છે.

આ ઉપરાંત ઉત્તરાખંડમાં બાગેશ્વર, નૈનીતાલ, પિથોરાગઢ, ચંપાવત અને ઉધમ સિંહ નગરમાં ભારેથી અતિભારે વરસાદને લઈને રેડ એલર્ટ જાહેર કરવામાં આવ્યું છે. દેહરાદૂન, પૌડી, ચમોલી, રુદ્રપ્રયાગ અને અલ્મોડામાં ઓરેન્જ એલર્ટ છે. ચમોલીમાં 26 સપ્ટેમ્બરે ઓરેન્જ એલર્ટ અને 27 સપ્ટેમ્બરે યેલો એલર્ટ છે. વહીવટીતંત્રે વિભાગોને હાઈ એલર્ટ પર રહેવા અને કટોકટીની પરિસ્થિતિનો સામનો કરવા માટે તમામ તૈયારીઓ પૂર્ણ રાખવા જણાવ્યું છે.

છત્તીસગઢના બસ્તર વિભાગમાં સતત વરસાદને કારણે અનેક નદીઓ અને નાળા પૂરથી વહી રહ્યા છે. નીચાણવાળા વિસ્તારોમાં પાણી ભરાઈ ગયું છે અને અનેક સ્થળોએ માર્ગ વ્યવહાર પ્રભાવિત થયો છે. જગદલપુર સહિત અનેક વિસ્તારોમાં ઘરોમાં પાણી ઘૂસી ગયાના અહેવાલ છે. અનેક જિલ્લાઓમાં વહીવટીતંત્રે શાળાઓ બંધ રાખવાનો નિર્ણય લીધો છે. કોંડાગાંવમાં એક ખેડૂતનું પૂરનાં પાણીમાં ડૂબી જવાથી મૃત્યુ થયું હોવાના પણ અહેવાલ છે.

ઓડિશામાં ડીપ ડિપ્રેશનની અસરને કારણે ભારે વરસાદ થયો છે. રાજ્યમાં ઓછામાં ઓછા 24 સ્થળોએ 100 મિમીથી વધુ વરસાદ નોંધાયો છે. નબરંગપુરના તેંતુલીખુંટીમાં 395 મિમી વરસાદ થયો હતો, જ્યારે નંદાહાંડીમાં 344 મિમી અને કોરાપુટના બોરીગુમાનમાં 307.8 મિમી વરસાદ નોંધાયો હતો. ભારે વરસાદને કારણે નદીઓનું જળસ્તર વધી ગયું છે અને અનેક વિસ્તારોમાં પાણી ભરાવા તેમજ ભૂસ્ખલનની ઘટનાઓ બની છે. ઝારખંડમાં પણ સતત વરસાદને કારણે જનજીવન પ્રભાવિત થયું છે. રાંચીના એજી મોર વિસ્તારમાં શુક્રવારે વહેલી સવારે એક મોટું ઝાડ સ્કૂલ બસ પર પડી ગયું. બસમાં શાળાના બાળકો સવાર હતા, પરંતુ તમામ બાળકો સુરક્ષિત બચી ગયા. પોલીસના જણાવ્યા અનુસાર બાળકોને સુરક્ષિત રીતે બહાર કાઢવામાં આવ્યા હતા. વરસાદ અને તેજ પવનને કારણે અનેક સ્થળોએ ઝાડ અને વીજળીના થાંભલા પડી જવાથી વીજ પુરવઠો પ્રભાવિત થયો હતો.

પશ્ચિમ બંગાળના ઉત્તર ભાગમાં પણ ભારે વરસાદની અસર જોવા મળી હતી. દાર્જાલિંગ જિલ્લાના તકદાહ ગ્રામ્ય હોસ્પિટલમાં શુક્રવારે વહેલી સવારે ભૂસ્ખલન થયું હતું. આ ઘટનામાં એક દર્દીના સગાને સામાન્ય ઈજા થઈ હતી, જ્યારે દર્દીઓને સુરક્ષિત રીતે જિલ્લા હોસ્પિટલમાં ખસેડવામાં આવ્યા હતા.

બિહારમાં નેપાળમાં સતત વરસાદ બાદ નદીઓનું જળસ્તર વધવાને કારણે અનેક વિસ્તારોમાં પૂરનો ખતરો વધી ગયો છે. અનેક સ્થળોએ નદીઓ ચેતવણી અથવા જોખમના નિશાનથી ઉપર વહી રહી છે. સરકારી આંકડા અનુસાર, સુપૌલના બીરપુરમાં કોસી, ખગડિયાના બલતારામાં કોસી, મુઝફ્ફરપુરના બેનીબાદમાં બાગમતી અને ભાગલપુરના સુલ્તાનગંજમાં ગંગાનું જળસ્તર જોખમના નિશાનથી ઉપર નોંધાયું હતું.