• મંગળવાર, 17 નવેમ્બર, 2026

રનમેદાન- રણમેદાન : વિજય પતાકા

ક્રિકેટ ભારતમાં એક રમત માત્ર નથી કરોડો નાગરિકોનો તેની સાથે સંવેદનાસભર નાતો છે. આ સંબંધ પુન: જીવંત થયો છે. અન્ડર 19 ક્રિકેટમાં ભારતના યુવા ક્રિકેટરોએ દર્શાવેલા કૌશલ્યે એવું સાબિત કર્યું  કે જેનો ભૂતકાળ ભવ્ય છે તે ભારતીય ક્રિકેટના ભવિષ્યનું બેટ પણ સુરક્ષિત અને પ્રશિક્ષિત હાથોમાં છે. ક્રિકેટના ક્ષેત્રે વિશ્વ સ્તરે તિરંગો લહેરાવવા માટે નવયુવાન ક્રિકેટર્સ પણ તૈયાર છે. ઓમાનમાં રમાયેલા એશિયાકપના ફાઈનલ મેચમાં પાકિસ્તાનને પરાસ્ત કરીને ભારતના ક્રિકટરોએ મેદાનમાં અને ક્રિકેટપ્રેમીઓના મનમાં જગ્યા પ્રાપ્ત કરી, તાળીઓ મેળવી એવું કહી શકાય. આ ભારતીય ક્રિકેટનો આગામી સમય છે જે તેના ઈતિહાસમાં સુવર્ણ અક્ષરે સ્થાન પામશે.

પાકિસ્તાને આપેલા 338 રનના માતબર લક્ષ્યાંક સામે ભારતની ક્રિકેટટીમ મેદાનમાં ઉતરી હતી. ફાઈનલમાં પણ આ આંક સુધી પહોંચવાનું સરળ ન જ હોય.  લોઢાના ચણા ચાવવા જેવી આ બાબત ભારતના યુવા ક્રિકેટરોએ શીરો ગળે ઉતારવા જેટલી સરળ બનાવી દીધી. યુવા ક્રિકેટર્સે સાબિત કરી દીધું કે તેમના માટે કોઈ પડકાર, કોઈ લક્ષ્ય નાનું નથી. મિડલ ઓર્ડર જ્યારે ધરાશાયી થયો ત્યારે ટીમને જાણે આંખે અંધારાં આવવા જેવી સ્થિતિ થઈ, સમજી શકાય કે ડ્રાસિંગરૂમનું વાતાવરણ કેવું તણાવયુક્ત હશે, પરંતુ મેદાનમાં રહેલા બેટર સમજી ગયા કે હવે આ રનમેદાન નથી, રણમેદાન છે. સંયમ, પરિપક્તવતા અને ધૈર્ય દર્શાવીને તેમણે બાજી ભારતના પક્ષે પલટી નાંખી.

આર્યવીર સહેવાગ આ જીતના સૌથી મોટા શ્રેયસ્કર ખેલાડી કહી શકાય. આખી ટુર્નામેન્ટમાં તેમણે સામેની ટીમના બોલર્સને હંફાવી દીધા.  દબાવની ચરમસીમા વચ્ચે 49 રન સાથે નોટઆઉટ રહીને મોહિત ઉલ્વાએ પણ રમતનું પ્રદર્શન કર્યું તેમના આ કૌવત-કૌશલ્યથી ગુજરાતમાં તો ખુશી બેવડાઈ, તેના ઘર પાસે ફટાકડા પણ ફૂટ્યા. તો મનાલ ચૌહાણની પીઠ થાબડવાની પણ ક્રિકેટર પ્રેમીઓને જરુરત વર્તાઈ છે કારણ કે નિર્ભય અને આક્રમક બાટિંગથી તેમણે હારેલી બાજી વિજયમાં પલટાવી. અંતિમ દડા સુધી ચાલેલા આ રોમાંચે આમ તો દર્શકોના શ્વાસ અધ્ધર કરી દીધા હતા. દોડીને, કેચ કરીને એટલે કે ફક્ત શરીરથી થતી પ્રવૃત્તિનું આ પરિણામ નથી. માનસિક મજબૂતી, દૃઢ મનોબળને લીધે આ શક્ય બન્યું છે.

આજના યુવા ક્રિકેટરો નેશનલ ક્રિકેટ એકેડેમી (ગઈઅ) અને તળથી મળતા આધુનિક પ્રશિક્ષણને કારણે દબાણની પરિસ્થિતિમાં પણ ડગમગતા નથી. પાકિસ્તાન સામેના હાઈ-પ્રેસર મેચમાં જે રીતે ખેલાડીઓએ બાટિંગ કર્યું તે દર્શાવે છે કે આ ખેલાડીઓ માત્ર શારીરિક રીતે સ્વસ્થ અને પ્રતિભાશાળી નથી પરંતુ માનસિક રીતે પણ પરિપક્વ છે. ભારતીય ક્રિકેટની સૌથી મોટી તાકાત તેની ’બેન્ચ સ્ટ્રેન્થ’ છે; જ્યારે પણ કોઈ મુખ્ય ખેલાડી કે ટીમ સંકટમાં હોય, ત્યારે કોઈને કોઈ નવો ચહેરો ઉભો થઈને મેચ જિતાડી આપે છે.

અન્ડર-19 સ્તરનો આ વિજય માત્ર એક ટ્રોફી જીતવા પૂરતો મર્યાદિત નથી, પરંતુ તે આવનારા સમયમાં ભારતીય સિનિયર રાષ્ટ્રીય ટીમ માટે મજબૂત પાયો નાખવાનું કામ કરે છે. આ ખેલાડીઓ ભવિષ્યના સુપરસ્ટાર છે, જેઓ આવનારા વર્ષોમાં દેશનું પ્રતિનિધિત્વ કરશે. આ યુવાઓએ દેશવાસીઓને ગર્વ લેવાની સોનેરી તક આપી છે અને સાબિત કરી દીધું છે કે જ્યારે ભારતીય જર્સી પહેરીને મેદાન પર ઉતરે છે, ત્યારે જીત સિવાય બીજું કોઈ લક્ષ્ય હોતું નથી.  ભારતીય ક્રિકેટ એક લેગેસી- પરંપરા છે તેવું પુન: પુરવાર થયું છે.

 

 

 

 

 

 

 

ઇ-પેપરના નવા શુલ્ક