સેનામાં પસંદગી પામેલા વડનગરના યુવાનનું હૃદયરોગના હુમલાથી અવસાન

દોડની પ્રેક્ટિસ કરતી વખતે આવ્યો હૃદયનો હુમલો

ડોળાસા: કોડિનાર તાલુકાના વડનગર ગામના આહીર સમાજના યુવાનનું સૈનામાં પ્રેક્ટિસ દરમિયાન હૃદયરોગનો હુમલો આવતા મૃત્યુ નીપજ્યું હતું. નાના એવા ગામમાં શોકનો માહોલ છવાયો છે.

વડનગરના વિવેકભાઈ પંપાણિયા નામનો યુવાન સીઆઈએસએફની ત્રણેય પરીક્ષા પાસ કરીને પસંદગી પામ્યો હતો. આ યુવાન ગત તા.12મીએ વહેલી સવારે દોડની પ્રેક્ટિસ કરતો હતો ત્યારે હૃદયરોગનો  હુમલા આવતા સારવાર માટે અંબુજા હોસ્પિટલ લઇ જવાયો. જ્યાં તબીબોએ તેમને મૃત જાહેર કર્યો હતો. આથી આહીર સમાજ અને વડનગરમાં ભારે ગમગીની છવાઈ છે. આ યુવાનના પરિવારજનોના કરુણ આક્રંદથી વાતાવરણ શોકમય બની ગયું હતું.

જાણવા મળતી વિગત મુજબ, વિવેકભાઈના માતા શાંતિબેન અને પિતા હિંમતભાઈ વિકલાંગ છે પણ તેમનો પુત્ર સીઆઈએસએફમાં  પસંદગી પામતા ખુશ થયા હતા અને ગામમાં મીઠાઈ પણ વહેંચી હતી.