23 યાત્રીના જીવન જોખમમાં : હિંદ મહાસાગરમાં વેપારી જહાજોને એલર્ટ કરાયા
તેહરાન,
તા. 1 : અદનની ખાડી અને હિંદ મહાસાગરમાં સમુદ્રી ડાકુઓનો આતંક ફરી વધ્યો છે. સોમાલી
સમુદ્રી ડાકુઓએ એક ઈરાની માછલી પકડવાના જહાજને હાઈજેક કરી લીધું છે. આ જહાજ ઉપર 23
લોકો સવાર હતા. આતંક ફેલાવવામાં 12 સોમાલી ડાકુ સામેલ હોવાના અહેવાલ સામે આવ્યા છે.
મેરીટાઈમ
સિક્યોરિટી સેન્ટર ઈન્ડિયન ઓશને ચેતવણી જાહેર કરતા કહ્યું હતું કે આ જહાજ કોમર્શિયલ
શિપિંગ લેનની નજીક પહોંચી રહ્યું છે. જેનો ઉપયોગ સમુદ્રી ડાકુઓ આગળના હુમલા માટે એક
ફલોટિંગ બેઝ તરીકે કરી શકે છે. એક સુરક્ષા
અધિકારીએ નામ ન આપવાની શરતે કહ્યું હતું કે, અજિની નામના જહાજને પૂર્વોત્તર સોમાલીયા
નજીકથી હાઈજેક કરવામાં આવ્યું હતું. જહાજ ઉપર 21 ઈરાની ક્રૂ મેમ્બર અને સોમાલિયાના
બે સિક્યોરિટી ગાર્ડ સવાર હતા. આ તમામ લોકો અંગે કોઈ નક્કર જાણકારી સામે આવી શકી નહોતી.
યુરોપીય સંઘના નૌકાદળ અભિયાન ઓપરેશન એટલાન્ટાએ સમગ્ર બનાવ અંગે તપાસ શરૂ કરી છે.
