ગિર સોમનાથમાં તોડકાંડ કેસમાં બે પીએસઆઈ સસ્પેન્ડ

વેરાવળ, તા.1: ગિર સોમનાથ જિલ્લામાં પ્રભાસ પાટણ હાઇવે પર આવેલી હોટેલ રોયલ મેન્શનમાં ગત 20 જુલાઈએ પાડવામાં આવેલી જુગારની રેડ બાદ પોલીસ અધિકારીઓ દ્વારા એક મહિલા પીએસઆઈ પાસેથી રૂપિયા પાંચ લાખનો તોડ કરવામાં આવ્યો હોવાના ગંભીર આક્ષેપો સામે આવ્યા હતા, જેના પગલે પોલીસ બેડામાં ભારે ચકચાર મચી ગઈ છે અને આ ગંભીર ગેરરીતિને ધ્યાનમાં રાખીને ઉચ્ચસ્તરીય તંત્ર દ્વારા કડક દાખલારૂપ કાર્યવાહી કરવામાં આવી છે.

આ ગંભીર મામલે જૂનાગઢ રેંજ આઈજી રાજેન્દ્રાસિંહ ચુડાસમા સમક્ષ ભોગ બનનાર મહિલા પીએસઆઈએ રૂબરૂ રજૂઆત કરી સ્ફોટક વિગતો આપતા, જિલ્લા પોલીસવડા જયદીપાસિંહ જાડેજાના માર્ગદર્શન હેઠળ હાથ ધરાયેલી પ્રાથમિક તપાસમાં ગેરરીતિની પુષ્ટિ થતાં એસઓજી પીએસઆઈ ડી.એમ. કાગડા અને તત્કાલીન એલસીબી પીએસઆઈ એચ.એલ. જેબલિયાને તાત્કાલિક અસરથી સસ્પેન્ડ કરી દેવામાં આવ્યા છે, અને આ પ્રકરણની વધુ તપાસ હજુ ચાલુ છે.