- 23 વર્ષની ઐતિહાસિક સફર બાદ ભાવુક વીડિયો સંદેશ દ્વારા રાષ્ટ્રીય જર્સીને કાયમ માટે અલવિદા કહ્યું
નવી દિલ્હી,
તા.5ઃ વિશ્વ ફૂટબોલના મહાનતમ
ખેલાડીઓમાં સ્થાન ધરાવતા પોર્ટુગલના સ્ટાર ફોરવર્ડ ક્રિસ્ટિયાનો રોનાલ્ડોએ આંતરરાષ્ટ્રીય
ફૂટબોલમાંથી સત્તાવાર નિવૃત્તિ જાહેર કરી દીધી છે. 23 વર્ષ લાંબી ઐતિહાસિક કારકિર્દી, છ વર્લ્ડ કપ અને 234 આંતરરાષ્ટ્રીય મેચોમાં વિશ્વવિક્રમી 146 ગોલ ફટકાર્યા બાદ તેણે ચાહકોને ભાવુક વીડિયો
સંદેશ દ્વારા રાષ્ટ્રીય જર્સીને કાયમ માટે અલવિદા કહ્યું છે.
નેશનલ ટીમના કેમ્પમાંથી બહાર નીકળી જવા બદલ પોર્ટુગીઝ ફૂટબોલ
ફેડરેશન દ્વારા રોનાલ્ડો પર $285નો દંડ ફટકારવામાં
આવ્યો હતો અને 30 દિવસ માટે રાષ્ટ્રીય
ટીમમાંથી સસ્પેન્ડ કરવામાં આવ્યો હતો. તેના બરાબર બે અઠવાડિયા બાદ આ નિર્ણય સામે આવ્યો
છે. જોકે, 40 વર્ષીય રોનાલ્ડો ક્લબ
ફૂટબોલ રમવાનું ચાલુ રાખશે અને હાલ સાઉદી અરેબિયાની અલ-નાસર ક્લબ વતી સીઝનના અંત સુધી
મેદાનમાં જોવા મળશે. કારકિર્દીમાં 1,000 ગોલના ઐતિહાસિક આંકડાને
સ્પર્શવાની નજીક પહોંચેલા રોનાલ્ડોના નામે હાલ 985 ગોલ નોંધાયેલા છે.
ઓગસ્ટ 2003માં આંતરરાષ્ટ્રીય
પદાર્પણ કરનાર રોનાલ્ડોએ પોતાની કેપ્ટનશીપ હેઠળ પોર્ટુગલને 2016માં સૌપ્રથમવાર યુરો
કપ અને 2019માં નેશન્સ લીગ ચેમ્પિયન
બનાવ્યું હતું. રાષ્ટ્રીય ટીમ માટે તેની આખરી મેચ 24 સપ્ટેમ્બરે વેલ્સ સામે હતી, જેમાં પોર્ટુગલનો 1-0થી વિજય થયો હતો.
પોતાના નિવૃત્તિના વીડિયોમાં રોનાલ્ડોએ જણાવ્યું હતું કે, પોર્ટુગલની જનતાને, મારી રાષ્ટ્રીય ટીમની 7 નંબરની જર્સી પરત કરવાનો દિવસ આવી ગયો છે.
મને ક્યારેય એવું નહોતું લાગ્યું કે આ ફક્ત મારી જ છે, પરંતુ 23 વર્ષ સુધી મને તેને પહેરવાનો, તેનું રક્ષણ કરવાનો અને વિશ્વભરના સ્ટેડિયમોમાં
તેને સાથે લઈ જવાનો લહાવો અને જવાબદારી મળી. આજે, તેને ભવિષ્યની પેઢીને સોંપવાનો સમય આવી ગયો છે. આ કોઈ સરળ નિર્ણય
નહોતો, કારણ કે કેટલાક નિર્ણયો
ફક્ત મગજથી નથી લેવાતા, તે હૃદયથી પણ લેવામાં
આવે છે. રાષ્ટ્રીય ટીમ સાથેની મારી સમગ્ર કારકિર્દી દરમિયાન, મેં હંમેશા મારી જાતને મર્યાદાઓથી પર ધકેલી
છે. હું જીતવા માંગતો હતો. હું વધુ સારો બનવા માંગતો હતો. હું ઇતિહાસ રચવા માંગતો હતો.
મેં હંમેશા મારી જાત પાસેથી સર્વશ્રેષ્ઠ પ્રદર્શનની માંગ કરી. મારે હંમેશા વધુ કરવું
હતું. મને હંમેશા વિશ્વાસ હતો કે આપણે હજુ આગળ વધી શકીએ છીએ, અને આ જર્સી માટે મેં મારું સર્વસ્વ આપી દીધું.
આજે, મેદાન પર રાષ્ટ્રીય
ટીમ સાથેની મારી સફરનો અંત આવે છે. હું ગર્વભેર મારું માથું ઊંચું રાખીને વિદાય લઉં
છું.
