પીપળવાનાં પાટિયા પાસે બાઇક પર જઈ રહેલા પાંચને કારચાલકે ઉલાળ્યા

            ઇજાગ્રસ્તો સારવારમાં : કારચાલક ફરાર

જેતલસર, તા, 19: રાજકોટ - જૂનાગઢ હાઇ વે પર કારે અડફેટે લેતા - બે બાઇક પર જઈ રહેલાં પીપળવા ગામના એક જ પરિવારના પાંચ લોકો ઈજાગ્રસ્ત થયા હતા. જેથી ઈજાગ્રસ્તોને સારવાર અર્થે જેતપુર સિવિલ હોસ્પિટલ બાદ વધુ સારવાર માટે જૂનાગઢ અને ત્યાંથી રાજકોટ સિવિલ હોસ્પિટલ ખાતે ખસેડવામાં આવ્યા હતા.

    પીપળવા ગામના પાટિયા નજીક કાર અને બાઇક વચ્ચે અકસ્માત સર્જાયો હતો. પીપળવા ગામેથી પોતાના બાઇક લઈને જેતપુર કોઈ કામ અર્થે જતા બોઘાભાઈ ભીખાભાઈ ડાભી, લખાભાઈ રાણાભાઈ ડાભી, હેતલબેન લખાભાઈ ડાભી, અજયભાઈ બોઘાભાઈ ડાભી અને રવિભાઈ લખાભાઈ ડાભીને જેતપુરથી જૂનાગઢ પૂરપાટ ઝડપે જતી  કારે પીપળવા ગામના પાટિયા નજીક અડફેટે લેતા તેઓ હવામાં ફૂટબોલની માફક ફંગોળાયા હતા. પાંચેય લોકો ગંભીર રીતે ઈજાગ્રસ્ત થયા હતા.

અસ્માત સર્જી કાર ચાલક ફરાર થઈ ગયો હતો. બાદ તે કાર કડી કલોલ ગામના આસિફ મંડલીની હોવાનું ખૂલ્યું હતું. જેથી પોલીસે તેના વિરુદ્ધ ગુનો નોંધી તપાસ હાથ ધરી છે.