નવી દિલ્હી, તા.9: દક્ષિણ લેબેનોનમાં
ઈઝરાયલે હવે સેન્ટ્રલ બૈરૂતને પણ નિશાન બનાવવા માંડયું છે. સોમવારની રાતે લેબેનોનની
રાજધાનીમાં ગાઢ વસ્તીવાળા રહેણાક વિસ્તારોને નિશાન બનાવતા હુમલા ઈઝરાયલે બોલાવ્યા હતાં.
બૈરૂતનાં જે વિસ્તારોમાં આ હુમલા કરવામાં આવ્યા તેની નજીકમાં જ સંયુક્ત રાષ્ટ્રીય કાર્યાલય,
સંસદ ભવન, પ્રધાનમંત્રી કાર્યાલય અને અનેક દૂતાવાસ પણ છે. લેબેનોનની સરકારી સમાચાર
એજન્સીનાં કહેવા અનુસાર બૈરૂતનાં જોક અલ-બ્લાટા વિસ્તારમાં પણ બે ઈઝરાયલી મિસાઈલો ત્રાટકી
હતી.
આ હુમલો એવા ટાણે કરવામાં આવ્યો
છે જ્યારે અમેરિકી દૂતે યુદ્ધવિરામની વાટાઘાટ માટે પોતાની યાત્રા સ્થગિત કરી દીધી છે.
હુમલા બાદ સમગ્ર વિસ્તારમાં એમ્બ્યુલન્સનાં સાયરન ગુંજી ઉઠયા હતાં. જો કે આ હુમલામાં
હતાહતની કોઈ સત્તાવાર જાણકારી હજી સુધી જારી કરવામાં નથી આવી.
એક માસથી વધુ સમય સુધી વિરામ
બાદ મધ્ય બૈરૂતમાં સતત બીજા દિવસે ઈઝરાયલે આ હુમલો કર્યો છે. રવિવારે રાસ અલ-નબાનાં
વિસ્તારોમાં થયેલા હુમલામાં હિઝબુલ્લાહનો પ્રવક્તા મોહમ્મદ અફીફ સહિત છ લોકો મરાયા
હતાં.
