ન્યૂઝિલેન્ડમાં ઈશાન પાસે ત્રણ રેકોર્ડની તક

મોહમ્મદ રિઝવાનનો રેકોર્ડ તોડવામાં માત્ર બે મોટી ઇનિંગની જરૂરિયાત : 2000 રન પણ પૂરા કરી શકશે

નવી દિલ્હી, તા. 21 : ભારતીય ટીમનો વિસ્ફોટક બેટ્સમેન ઈશાન કિશન ન્યૂઝિલેન્ડ સામે પાંચ મેચની ટી20 શ્રેણીમાં ત્રણ મોટા રેકોર્ડ પોતાનાં નામે કરી શકે છે. વધુમાં પાકિસ્તાનના મોહમ્મદ રિઝવાનનો રેકોર્ડ પણ તોડે તેવી સંભાવના છે. રિઝવન કોઈપણ ટેસ્ટ રમનારા દેશ માટે એક વર્ષમાં સૌથી વધારે ટી20 રન કરનારો બેટ્સમેન છે. આ ઉપરાંત ઈશાન કિશન પોતાના 2000 ટી20 રન કરવાની પણ નજીક છે અને એક વર્ષમાં સૌથી વધારે રનનો સૂર્યકુમાર યાદવનો રેકોર્ડ તોડી શકે છે.

ભારત અને ન્યૂઝિલેન્ડ વચ્ચે પહેલો મુકાબલો 22 ઓક્ટોબરના ક્રાઇસ્ટચર્ચમાં રમાવાનો છે. આ મેચમાં ઈશાન કિશન સરળતાથી સૂર્યકુમારનો રેકોર્ડ તોડી શકે છે. ઈશાનને એક કેલેન્ડર યરમાં સૌથી વધારે ટી20 રન કરનારો ભારતીય બેટ્સમેન બનવામાં માત્ર સાત રનની જ જરૂરિયાત છે. વર્તમાન સમયે રેકોર્ડ સૂર્યકુમાર યાદવનાં નામે છે. જેણે 2022માં 1164 રન કર્યા હતા. ઈશાને 2026માં અત્યારસુધીમાં 34 ઇનિંગમાં 158 રન કર્યા છે. જેમાં એક સદી અને સાત અર્ધસદી સામેલ છે.

ઈશાન સામે બીજું મોટું લક્ષ્ય પાકિસ્તાની વિકેટ કીપર મોહમ્મદ રિઝવાનનો રેકોર્ડ છે. રિઝવાને 2021માં પાકિસ્તાન માટે એક કેલેન્ડર યરમાં સૌથી વધારે 1326 ટી20 રન કર્યા હતા. ઈશાન આ રેકોર્ડથી 139 રન પાછળ છે. આ માટે ઈશાનને બે મોટી ઇનિંગની જરૂરિયાત છે.

વધુમાં ઈશાન કિશન પાસે ત્રીજી મોટી ઉપલબ્ધિ મેળવવાની પણ તક છે. તે ટી20 આંતરરાષ્ટ્રીય ક્રિકેટમાં 2000 રન પૂરા કરવાથી માત્ર 46 રન દૂર છે. અત્યારસુધીમાં રમેલા 66 મુકાબલામાં તેણે 1954 રન કર્યા છે. જો ઈશાન ઉપલબ્ધિ મેળવશે તો ટી20 ક્રિકેટમાં 2,000 રન પૂરા કરનારો સાતમો ભારતીય બેટ્સમેન બની જશે.