2027માં છ દિવસ ચાલશે નીટ

દેશભરમાં એક હજારથી વધુ પરીક્ષા કેન્દ્ર હશે ઃ કોમ્પ્યુટર આધારિત રહેશે પરીક્ષા

નવી દિલ્હી, તા. 9 ઃ દેશની સૌથી મોટી તબીબી પ્રવેશ પરીક્ષા નીટ-યુજી 2027માં કમસે કમ છ દિવસ સુધી ચાલશે; જે પૂર્ણપણે કોમ્પ્યુટર આધારિત પરીક્ષા રહેશે. દેશભરમાં એક હજારથી વધુ પરીક્ષા કેન્દ્રો બનાવાશે. નીટ પેપર લીક વિવાદથી દેશભરમાં રોષ વચ્ચે નિયમોમાં આ બદલાવ કરાયા છે. એન્જિનીયરિંગની પ્રવેશ પરીક્ષા જેઈઈની જેમ નીટની પરીક્ષા પણ અલગ-અલગ દિવસે યોજાશે તેવું જાણવા મળે છે.

આવતા વર્ષે યોજાનારી નીટ-યુજીની પરીક્ષામાં પેપરલીક જેવી કોઈપણ ઘટના ન બને તેની તકેદારી રખાશે.

આ વખતે પેનથી પેપર લખવાની પદ્ધતિનું સ્થાન કોમ્પ્યુટર પરીક્ષા પદ્ધતિ લેશે. વર્ષોથી આ બદલાવની ચર્ચા સરકારમાં ચાલી રહી હતી.

પેપર લીક વિવાદથી દેશભરના વિદ્યાર્થી, વાલી સમુદાયમાં નારાજગી ફેલાયા બાદ પરીક્ષા પ્રક્રિયામાં સુધારા કરાયા છે.  નીટ-યુજીની પરીક્ષાના પરિણામના આધારે ડેન્ટલ, આયુર્વેદ, યુનાની અને સિદ્ધ ચિકિત્સા જેવા સ્નાતક અભ્યાસક્રમોમાં પણ પ્રવેશ અપાય છે.