મધદરિયે ડૂબતી બોટનો વીડિયો વાયરલ
: નાવિકોનો બચાવ
45મી મહાજન સ્મારક સમુદ્ર સઢવાળી
હોડી સ્પર્ધા દરમિયાન એક મોટી દુર્ઘટના ટળી
રાજકોટ, તા. 18: સુરતના દરિયાકિનારે
ગુજરાત સરકારના રમતગમત, યુવા અને સાંસ્કૃતિક પ્રવૃત્તિઓ વિભાગ તથા સુરત જિલ્લા વહીવટી
તંત્ર દ્વારા આયોજિત 45મી મહાજન સ્મારક સમુદ્ર સઢવાળી 21 કિલોમીટરની હોડી સ્પર્ધા દરમિયાન
એક મોટી દુર્ઘટના ટળી હતી. સ્પર્ધા દરમિયાન ત્રણ હોડી અચાનક પલટી મારી જતાં અફરાતફરી
મચી ગઈ હતી, જોકે તમામ નાવિકોનો આબાદ બચાવ થયો હતો. હરિઓમ આશ્રમ-નડિયાદ પ્રેરિત આ પરંપરાગત રેસ છેલ્લા
45 વર્ષથી સતત યોજાઈ રહી છે. આ વર્ષે પણ હજીરા રો-રો ફેરીથી મગદલ્લા પોર્ટ આશરે 21
કિલોમીટરની હોડી સ્પર્ધા યોજાઈ હતી. જેમાં કુલ 10 જેટલી સઢવાળી હોડીઓએ આ પડકારજનક રેસમાં
ભાગ લીધો હતો. પ્રથમ વિજેતાને 51,000, દ્વિતીયને 35,000 અને તૃતીય ક્રમે આવનારને
25,000નું રોકડ પુરસ્કાર જાહેર કરાયું હતું.
ત્યારે રેસ જ્યારે મધદરિયે પૂરજોશમાં
ચાલી રહી હતી, ત્યારે અચાનક પવનના વેગ અથવા તકનીકી કારણોસર ત્રણ સઢવાળી હોડી પલટી ખાઈ
ગઈ હતી. હોડી પલટી જતાં ક્ષણભર માટે કિનારે ઉભેલા દર્શકો અને આયોજકોમાં ચિંતાનું મોજું
ફરી વળ્યું હતું. જોકે, હોડીમાં સવાર તમામ નાવિકો કુશળ તરવૈયા હોવાથી તેઓએ હિંમત હારી
નહોતી અને પાણીમાં તરીને પોતાનો જીવ બચાવ્યો હતો.
સુરતની રમતગમત પ્રેમી જનતા માટે આ રેસ હંમેશાં આકર્ષણનું
કેન્દ્ર રહી છે. આજે પણ મોટી સંખ્યામાં લોકો હજીરા અને મગદલ્લાના કિનારે આ હરિફાઈ નિહાળવા
માટે ઉમટી પડયા હતા. દરિયાઈ પવન અને મોજાઓ વચ્ચે રમાતી આ રમત જેટલી સાહસિક છે એટલી
જ જોખમી પણ છે, પરંતુ અનુભવી નાવિકોની સતર્કતાને કારણે આજે કોઈ જાનહાનિ થઈ ન હતી.
