મૃતકના વારસદારોને વળતર પેટે
રોકડ રકમ ચૂકવવા સેશન્સ કોર્ટનો હુકમ
(ફૂલછાબ ન્યુઝ)
ભાવનગર, તા.14 : જિલ્લાના મહુવા
માર્કેટ યાર્ડ પાસે ત્રણેક વર્ષ પૂર્વે એક યુવકની થયેલી હત્યાના ચકચારી બનાવમાં મહુવા
કોર્ટે બન્ને હત્યારા ભાઈને આજીવન કેદની સજા અને રોકડ રકમનો દંડ ફટકાર્યો છે. દંડની
રકમ મૃતકના વારસદારોને વળતર પેટે ચૂકવી આપવા કોર્ટે હુકમ કર્યો છે.
સાવરકુંડલાના વીજપડી ગામે હસની
ચોકમાં રહેતા વારીસભાઈ યાસીનભાઈ ચાવડા અને તેમના મોટાભાઈ મુનાફભાઈ ઉર્ફે પિન્ટુભાઈ
ચાવડાને ગત તા.28-4-2023ના રોજ પાડોશમાં રહેતા અફજલ મુસાભાઈ પઠાણ નામના શખસ સાથે શેરીના
ચોકમાં રોડની વચ્ચે આઈસર મુકવા બાબતે સામાન્ય બોલાચાલી થઈ હતી. તેની દાઝ રાખી રાત્રિના
સમયે વારીસભાઈ, મુનાફભાઈ અને તેમના મામા રફિકભાઈ સમા ગોરડકા ગામના ઘુઘાભાઈ પંચોળીની
ડુંગળી ભરીને મહુવા યાર્ડના પાછળના ભાગે ખેતરમાં ખાલી કરવા ગયા હતા. ત્યારે અફજલ પઠાણ
અને તેનો ભાઈ નવાજ મુસાભાઈ પઠાણે આવી ગાળો દઈ મુનાફભાઈને છરીનો ઘા ઝીંકી હત્યા કરી
તેમજ વારીસભાઈને ધોકો મારી ઈજા પહોંચાડી હતી. આ બનાવ અંગે વારીસભાઈ ચાવડાએ નોંધાવેલી
ફરિયાદના આધારે મહુવા પોલીસે હત્યા, મારામારી, જાનથી મારી નાખવા સહિતની કલમો હેઠળ ગુનો
નોંધી બન્ને હત્યારાની ધરપકડ કરી જેલમાં ધકેલી દીધા હતા.
આ અંગેનો કેસ મહુવાના બીજા એડી. સેશન્સ જજ એ.એસ. પાટીલની
કોર્ટમાં ચાલી જતાં સરકારી વકીલની દલીલો અને રજૂ થયેલા આધાર-પુરાવાઓને ધ્યાને લઈ ન્યાયધીશ
પાટીલે બન્ને હત્યારા ભાઈ અફજલ પઠાણ અને નવાજ ઉર્ફે ગટી પઠાણને તકસીરવાન ઠેરવી આજીવન
કેદની સજા અને રોકડ રકમનો દંડ ફટકાર્યો હતો.
