રામોલમાં પિતાએ પાંચ વર્ષની પુત્રીને પાઇપ મારી હત્યા કરી

ઘરકંકાસથી ઉશ્કેરાઈ પત્ની અને પુત્રી ઉપર હુમલો કર્યો

અમદાવાદ, તા.29: અમદાવાદના રામોલની વિનાયક સોસાયટીમાં ઘરકંકાસમાં પતિએ પત્ની અને દીકરીને પાઇપથી માર માર્યો હતો. જેમાં પાંચ વર્ષની દીકરીનું મૃત્યુ થતાં પરિજનો ઘેરા શોકમાં ગરકાવ થઈ ગયા છે. પત્ની હોસ્પિટલમાં સારવાર હેઠળ છે. ઘટનાને લઈ પોલીસ આરોપી પતિની શોધખોળ હાથ ધરી છે.

મળતી માહિતી પ્રમાણે હીરાઘસુ કારીગર દિલીપ કુશવાહ (ઉં.45)એ તેની 40 વર્ષની પત્ની અને 5 વર્ષની દીકરી પર મકાન બાબતે ચાલતા કંકાસને લઈને વહેલી સવારે ઘાતક હુમલો કર્યો હતો. પોતાનાં ઘરથી દૂર હીરાનાં કારખાનામાં જ રહેતા પતિ વહેલી સવારે ઘરે આવીને ઘટનાને અંજામ આપ્યો હતો. દિલીપ કુશવાહે તેની પત્ની આશા અને દીકરી ધરાને પાઇપ અને પથ્થરોથી જીવલેણ હુમલો કરતાં દીકરીનું ઘટના સ્થળે જ મૃત્યુ નીપજ્યું હતું. ગઈકાલે રાત્રે તે તેની પત્ની અને બાળકીને મળવા આવ્યો હતો પરંતુ તે સમયે ઝઘડો થતાં તેને પોતાની પાસે પડેલા પાઇપ વડે પત્ની અને બાળકીને માથામાં ફટકારતા બાળકીનું ઘટનાસ્થળે મૃત્યુ નીપજ્યું હતું. પત્નીને ગંભીર હાલતમાં હોસ્પિટલ ખસેડવામાં આવી છે.