ફ્રોડની રકમ આંગડિયા મારફતે અથવા યુએસડીટીમાં કન્વર્ટ કરીને દુબઈ અને ચીનમાં મોકલવામાં આવતી : 30થી વધુ ક્રિપ્ટો વોલેટ એડ્રેસ મળ્યા
અમદાવાદ,
તા. 11: ગુજરાત સી.આઈ.ડી. ક્રાઈમ અને સાયબર સેન્ટર ઓફ એક્સેલન્સ, ગાંધીનગરે દેશભરમાં
ફેલાયેલા અને અંદાજે રૂ. 719 કરોડથી વધુની રકમની છેતરાપિંડી આચરતા એક આંતરરાષ્ટ્રીય
સાયબર ક્રાઈમ સિન્ડિકેટનો પર્દાફાશ કરવામાં આવ્યો હતો. જેમાં તાપસ આગળ ચાલતા ખુદ બેંકના
બ્રાન્ચ મેનેજરની જ મિલિભગત સામે આવી છે. પોલીસે ભાવનગર સ્થિત ઇન્ડસઇન્ડ બેંકના તત્કાલીન
બ્રાન્ચ મેનેજર, તેમના પતિ સહિત કુલ 4 આરોપીની ધરપકડ કરી છે.
મ્યુલ
એકાઉન્ટથી ક્રિપ્ટો સુધી ફાઇનાન્શિયલ ઇન્ટેલિજન્સ યુનિટના ઇનપુટના આધારે તપાસ કરતા
બહાર આવ્યું છે કે, આરોપીઓ ભાવનગરની બ્રાન્ચમાં મ્યુલ એકાઉન્ટ ખોલાવી ભોગ બનનાર લોકોના
નાણાં જમા કરાવતા હતા. ત્યારબાદ ફ્રોડના નાણાં ચેકથી ઉપાડી અથવા ઓનલાઈન ટ્રાન્સફર કરી
રોકડમાં ફેરવવામાં આવતા હતા. આ રોકડ રકમ આંગડિયા મારફતે અથવા યુએસડીટી (ક્રિપ્ટો કરન્સી)માં
કન્વર્ટ કરીને દુબઈ અને ચીનમાં બેઠેલા માસ્ટરમાઈન્ડ્સને મોકલી આપવામાં આવતી હતી. તપાસ
દરમિયાન 30થી વધુ ક્રિપ્ટો વોલેટ એડ્રેસ મળી આવ્યા છે. આ એક જ નેટવર્કનો ઉપયોગ કરીને
દેશભરમાં હજારો લોકો સાથે છેતરાપિંડી કરવામાં આવી છે. આ નેટવર્ક સાથે જોડાયેલા મુખ્ય
રાજ્યોમાં મહારાષ્ટ્ર (300 કેસ), તમિલનાડુ (203 કેસ), કર્ણાટક (194 કેસ), તેલંગાણા
(128 કેસ), ગુજરાત (97 કેસ), કેરળ (91 કેસ), ઉત્તર પ્રદેશ (88 કેસ) અને દિલ્હી(74 કેસ)નો
સમાવેશ થાય છે.
પોલીસ
તપાસમાં સામે આવ્યું છે કે, પકડાયેલા આરોપી ભુમિકા જગદીશભાઇ લશ્કરી (ઇન્ડસઇન્ડ બેંક,
ભાવનગરના બ્રાન્ચ મેનેજર) અને તેમના પતિ સાહીલ સાધ આ રેકેટના સૂત્રધારો સાથે સંપર્કમાં
હતા. બેંક મેનેજર જાણતા હતા કે ખાતામાં ફ્રોડના રૂપિયા આવે છે, છતાં તેમણે મ્યુલ એકાઉન્ટ
ખોલવામાં અને નાણાં ઉપાડવામાં મદદ કરી હતી. આ કામ માટે તેઓ પ્રતિ ટ્રાન્જેક્શન 1% કમિશન
મેળવતા હતા. સાહિલ સાધ આ સમગ્ર પ્રક્રિયામાં મિડિયેટર તરીકે કામ કરતા હતા. ભૂમિકા લશ્કરી
(બેંક મેનેજર) મ્યુલ એકાઉન્ટ ખોલવા અને નાણાં ઉપાડવા માટે બાંકિંગ પ્રોસેસમાં મદદ કરવી
હતી. જ્યારે સાહીલ સાધ (મેનેજરના પતિ) બેંક અને ફ્રોડસ્ટર્સ વચ્ચે મધ્યસ્થી કરતો હતો.
ફ્રોડના નાણાં આંગડિયા મારફતે મોકલવા અને ક્રિપ્ટોમાં કન્વર્ટ કરી વિદેશ મોકલવા માટે
ભાર્ગવ પંડ્યાને 0.20% કમિશન મળતું હતું. જ્યારે અન્ય આરોપી મહિપાલાસિંહ ગોહિલ મ્યુલ
એકાઉન્ટ પૂરા પાડતો હતો અને રોકડ કલેક્ટ કરી મુખ્ય આરોપીઓને પહોંચાડતો હતો.
ગાંધીનગર
સી.આઈ.ડી. સાયબર ક્રાઈમે અગાઉ આ કેસમાં 10 આરોપીને ઝડપી લીધા હતા, જ્યારે હવે બેંક
મેનેજર સહિત વધુ 4ની ધરપકડ કરી કાયદેસરની કાર્યવાહી હાથ ધરી છે.
