રક્ષાબંધનની ઉજવણી કરી પરત મોડાસા પરત ફરતી વખતે ચાલકે કાબૂ ગુમાવતા કાર 40 ફૂટ નીચે ખાબકી
મોડાસા,
તા. 10: મોડાસા શહેરના બાયપાસ રોડ પર રક્ષાબંધન
પર્વની રાત્રીએ અકસ્માતની ઘટનામાં ચાર યુવા હોનહાર શિક્ષકોના મૃત્યુ નિપજતા સમગ્ર શહેરમાં
શોકનું મોજું ફરી વળ્યું હતું મોડાસામાં આવેલા માઝુમ બ્રિજ પાસે નવમી ઓગસ્ટે રાતે મોટી
દુર્ઘટના સર્જાઈ હતી. જેમાં મોડાસાના સહયોગ તરફથી આવતી કાર 40 ફૂટ ઊંડી માઝુમ નદીમાં
ખાબકી હતી, જેમાં ચાર યુવા શિક્ષકોના ઘટના સ્થળે જ મૃત્યુ નિપજ્યા હતા.
પ્રાપ્ત
માહિતી અનુસાર, મોડાસા શહેરની ખાનગી શાળા સાથે મળી નીટ અને જેઈઈના ક્લાસ ચાલવતા વિ-જ્ઞાન
ઇન્સ્ટિટયૂટના અમદાવાદ ચાંદખેડાની કે.બી રોયલ અલ્ટેજા સોસાયટીમાં રહેતા વિશાલ જીવણલાલ
રાજ અને તેમના સાથી શિક્ષકો રક્ષાબંધન પર્વની
ઉજવણી કરી કાર લઇ પરત મોડાસા ફરતાં હતા. આ સમયે બાયપાસ રોડ પર આવેલા માઝુમ બ્રિજ
પરથી પસાર થતી વખતે વિશાલ રાજે કાર ગફલતભરી રીતે હંકારી કાબૂ ગુમાવતા બ્રિજ પરથી
40 ફૂટ નીચે ધડકાભેર ખાબકી હતી.
આ અકસ્માતમાં
કાર ચાલક વિશાલ રાજ, આબિદ મરડિયા( રહે, સથવાસ રાધનપુર, પાટણ), દીપક જગદીશ મેવડા (રહે,
મુવાડા, પાલી, રાજસ્થાન અને કપિલ અવધેશ શર્મા (રહે, સંજયનગર, ભરતપૂર રાજસ્થાન) મૃત્યુ
નીપજ્યા હતા. દૂર્ઘટના સ્થળે લોકોના ટોળા ઉમટયા હતા. રક્ષા બંધન પર્વના સપરમા દહાડે
બનેલી આ ઘટનામાં ચાર-ચાર શિક્ષકના મૃત્યુ થતાં સમગ્ર પંથકમાં અરેરાટી ફેલાઈ ગઈ હતી.
આ ઘટનાની
જાણ થતાં જ ફાયર વિભાગ સહિત પોલીસ કાફલો ઘટના સ્થળે દોડી આવ્યો હતો અને સમગ્ર મામલે
તપાસ હાથ ધરી ચારેય મૃતકની લાશને પીએમ માટે ખસેડી મૃતક કાર ચાલકના પરિવારજન નિકુંજ
જીવણલાલ રાજ (રહે, આરાધ્ય હોમ્સ, ચાંદખેડા)ની ફરિયાદના આધારે અકસ્માતે મોતનો ગુનો નોંધી
કાયદેસરની કાર્યવાહી હાથ ધરી હતી.
