‘શોલે’ના ઠાકુરથી યુનોની ઠેકડી ઉડાડતું ઈરાન

ભારત સ્થિત દૂતાવાસે રસપ્રદ મીમ શેર કર્યું

નવી દિલ્હી, તા. 30 : ભારત સ્થિત ઈરાની દૂતાવાસે સંયુક્ત રાષ્ટ્રની લાચારી અને નિષ્ફળતા પર કટાક્ષ કરવા માટે બોલીવૂડ અને હોલીવૂડના જાણીતા પાત્રોનો સહારો લઈ એક રસપ્રદ મીમ શેર કર્યું છે.

એક તરફ ‘ડોક્ટર સ્ટ્રેન્જ’: માર્વેલના કાલ્પનિક સુપરહીરો ‘ડોક્ટર સ્ટ્રેન્જ’ના અનેક હાથોવાળા રૂપને દર્શાવીને કેપ્શન લખવામાં આવ્યું - ‘સ્કૂલની કિતાબો અનુસાર યુએન.’ આ ઇમેજ એવો સંદેશ આપે છે કે પુસ્તકોમાં યુએનને તમામ મોરચે કામ કરવાની તાકાત ધરાવતી સંસ્થા તરીકે રજૂ કરવામાં આવે છે. બીજી તરફ શોલેનો ‘ઠાકુર’ : વર્ષ 1975ની ક્લાસિક ફિલ્મ ‘શોલે’માં  ‘ઠાકુર બલદેવ સિંહ’ની લાચાર તસવીર મૂકીને કેપ્શન આપવામાં આવ્યું - ‘વાસ્તવિકતામાં યુએન.’ એટલે કે, હકીકતમાં યુએન કામ કરવાની પોતાની તમામ ક્ષમતા ગુમાવી ચૂકેલી એક લાચાર સંસ્થા બનીને રહી ગઈ છે.