ભારતનો ઐતિહાસિક રનચેઝ : સુપરમેન ગિલનું તોફાન

બરસાપાર, તા. 30 : ગુવાહાટીના બરસાપાર સ્ટેડિયમમાં ભારતે પહેલી વખત 400 પ્લસનો  રનચેઝ વનડે ક્રિકેટમાં હાંસલ કર્યો હતો.

મુકાબલાને ભારતીય ટીમે આઠ વિકેટે જીતીને અનેક રેકોર્ડ બનાવ્યા હતા. ખાસ કરીને પુરા મેચની શાન શુભમન ગિલ રહ્યો હતો. જેણે ધમાકેદાર અને વનડેની સૌથી ઝડપી બેવડી સદી ફટકારી હતી. ગિલે 133 બોલમા 223 રનની નોટઆઉટ ઈનિંગ રમી હતી. જ્યારે રોહિત શર્માએ પણ મુકાબલામાં શાનદાર 101 રન કર્યા હતા. જેની મદદથી  વિન્ડિઝે આપેલા 406 રનના લક્ષ્યને માત્ર 43.3 ઓવરમાં બે વિકેટે પાર કરીને શ્રેણી પણ ભારતે નામે કરી લીધી હતી. 2006મા દક્ષિણ આફ્રિકાએ ઓસ્ટ્રેલિયા સામે ચેઝ કરેલા ઐતિહાસિક 438 રન બાદ 20 વર્ષે બીજી વખત 400 પ્લસ રનનો સફળ રનચેઝ થયો હતો. ગિલે રનચેઝ કરતા ભારત તરફથી સૌથી મોટો વ્યક્તિગત સ્કોર કરવાનો રેકોર્ડ બનાવ્યો હતો.

આ મુકાબલામાં ભારતીય કેપ્ટન ગિલે ટોસ જીતીને પહેલા બોલિંગનો નિર્ણય કર્યો હતો. વિન્ડિઝે પહેલા રમતા 405 રનનો સ્કોર કર્યો હતો. જેને પામવા ઉતરેલી ભારતીય ટીમે મજબુત શરૂઆત કરી હતી. રોહિત શર્મા અને શુભમન ગિલે ખુલીને શોટ રમ્યા હતા. આ દરમિયાન ગિલે માત્ર 62 બોલમાં સદી પુરી કરી હતી. રોહિતે 72 બોલમાં સદી કરી હતી. જો કે બાદમાં 101 રને આઉગ થયો હતો. રોહિત અને ગિલ વચ્ચે પહેલી વિકેટ માટે 255 રનની મોટી ભાગીદારી થઈ હતી. બાદમાં આવેલા વિરાટ કોહલીએ 19 બોલમાં 29 રન કર્યા હતા. જ્યારે ગિલે 117 બોલમાં બેવડી સદી પુરી કરી હતી. ભારતે 43.3 ઓવરમાં લક્ષ્ય પાર પાડીને શ્રેણીમાં 2-0ની અજેય બઢત પણ બનાવી લીધી હતી. ગિલ સાથે ઋતુરાજ ગાયકવાડ પણ 31 રને નોટઆઉટ પરત ફર્યો હતો.

મુકાબલામાં વિન્ડિઝે પહેલા રમતા શાનદાર બેટિંગ કરી હતી. જોન કેમ્પબેલ, શાઈ હોપ અને અમીર જંગુએ સદી કરી હતી. કેમ્પબેલે 68 બોલમા પાંચ છગ્ગા અને નવ ચોગ્ગાની મદદથી 101, શાઈ હોપે 94 બોલમાં ત્રણ છગ્ગા અને આઠ ચોગ્ગાની મદદથી 104 તેમજ અમીર જંગુએ 77 બોલમાં ત્રણ છગ્ગા અને 13 ચોગ્ગાની મદદથી 114 રન ફટકાર્યા હતા. જેની મદદથી વિન્ડિઝની ટીમ 50 ઓવરમાં સાત વિકેટના નુકસાને 405 રન સુધી પહોંચી હતી. ભારત તરફથી આકિબ નબી, રવીન્દ્ર જાડેજા અને કુલદીપ યાદવને 2-2 વિકેટ મળી હતી. જ્યારે પ્રસિદ્ધ કૃષ્ણાએ એક વિકેટ લીધી હતી.

હાઈએસ્ટ વ્યક્તિગત સ્કોર

રન        ખેલાડી

264     રોહિત શર્મા

237     માર્ટિન ગપ્ટિલ

223     શુભમન ગિલ

219     વીરેન્દ્ર સેહવાગ

215     ક્રિસ ગેલ

ગિલ 10મી વખત પ્લેયર ઓફ ધ મેચ

2022 બાદ વનડે ક્રિકેટમાં શુભમન ગિલે સૌથી વધારે 10 વખત પ્લેયર ઓફ ધ મેચનો એવોર્ડ જીત્યો છે. વિરાટ કોહલી અને ટ્રાવિસ હેડ 9-9 વખત એવોર્ડ જીતીને  બીજા ક્રમાંકે છે. જ્યારે વિન્ડિઝના શાઈ હોપ અને શ્રીલંકાના કુસલ મેન્ડીસે 8-8 વખત એવોર્ડ જીત્યો છે.

વનડે ઈતિહાસમાં 400 પ્લસનો માત્ર બીજો સફળ રનચેઝ

ભારત પહેલા વનડે ક્રિકેટમાં 400થી વધારેનો ટોટલ માત્ર દક્ષિણ આફ્રિકાએ સફળ ચેઝ કર્યો હતો. દક્ષિણ આફ્રિકાએ જોહનિસબર્ગમાં ઓસ્ટ્રીલયા સામે 435 રનનો ટાર્ગેટ પાર કર્યો હતો.

ઈશાનનો રેકોર્ડ તુટયો

શુભમન ગિલે સૌથી ઝડપી બેવડી સદીનો રેકોર્ડ બનાવ્યો હતો. આ અગાઉ ઈશાન કિશને 2022મા બંગલાદેશ સામે 126 રનમાં બેવડી સદી પુરી કરી હતી. આ શુભમન ગિલની બીજી બેવડી સદી પણ છે. તેણે 2023મા ન્યુઝિલેન્ડ સામે 149 બોલમાં 208 રન કર્યા હતા.

સૌથી ઝડપી ડબલ સેન્ચુરી

બોલ      ખેલાડી   વિરૂદ્ધ  સ્થળ     વર્ષ

117      શુભમન ગિલ      વિન્ડિઝ  ગુવાહાટી            2026

126     ઈશાન કિશન        બંગલાદેશ           ચટગાંવ  2022

128     ગ્લેન મેક્સવેલ     અફઘાનિસ્તાન     વાનખેડે  2023

136     પથુમ નિસાંકા      અફઘાનિસ્તાન     પલ્લેકેલે 2024

138     ક્રિસ ગેલ ઝિમ્બાબ્વે           કેનબરા   2015

ભારતમાં સૌથી મોટો રનચેઝ

ટીમ       સ્કોર      ઓવર    લક્ષ્ય      વિરૂદ્ધ   વર્ષ

ભારત    406-2  43.3    405     વિન્ડિઝ  2026

ભારત    362-1  43.3    360     ઓસ્ટ્રેલિયા          2013

દ.આફ્રિકા            362-6  49.2    360     ભારત    2025

ઓસ્ટ્રેલિયા          359-6  47.5    359     ભારત    2019

ભારત    356-7  48.1    351     ઈંગ્લેન્ડ   2017

ભારત    351-4  49.3    351     ઓસ્ટ્રેલિયા          2013