ચેન્નઈ, તા.18: સમલૈંગિક સમુદાયને એક મોટી રાહતમાં મદ્રાસ હાઈકોર્ટે તામિલનાડુ સરકારને આદેશ આપ્યો છે કે, પારિવારિક સંઘો તરફથી આપવામાં આવેલા દસ્તાવેજોને માન્ય કરીને સજાતીય યુગલને સમાજમાં માન્યતા આપવામાં આવે.
અદાલતે કહ્યું હતું કે, આ પગલાંથી સાથે રહેવાની ઈચ્છા ધરાવતા સજાતીયોને સમાજમાં સ્થાન મળશે અને તે વિનાભય જીવી શકશે. એક લેસ્બિયન કપલ દ્વારા હાઈકોર્ટમાં અરજી દાખલ કરીને એવી દહેશત દેખાડવામાં આવી હતી કે તેમને પોતાનાં સંબંધીઓથી જ ભય છે.
જસ્ટિસ એન. આનંદ વેંકટેશે આ મામલે આદેશ જારી કરતાં કહ્યું હતું કે, આ પ્રકારનાં સમલૈંગિક સંબંધોમાં રહેતા લોકોને સ્થાન આપવામાં આવે તો એલજીબીટીક્યુ સમુદાયની સુરક્ષા સુનિશ્ચિત બનશે અને તેમને શોષણથી સુરક્ષિત કરી શકાશે. અદાલતે પોતાનાં આદેશમાં કહ્યું છે કે, નોંધણીની પ્રક્રિયા દરમિયાન પારિવારિક સંગઠન દ્વારા આપવામાં આવેલા દસ્તાવેજોને માન્ય કરતા રાજ્ય સરકાર ડીડીનાં રજિસ્ટ્રેશનની પ્રક્રિયા નિર્ધારિત કરી શકે છે.
