વડોદરામાં પૂર્વ ડેપ્યુટી મેયર અને પૂર્વ કોર્પોરેટર વચ્ચે તૂ તૂ મૈં મૈં...

ગોપી તલાટીએ મહિલા વિષે અભદ્ર ટિપ્પણી કર્યાનો સુનિતા શુક્લનો આક્ષેપ : મેં આવું કોઈ નિવેદન કર્યું જ નથી - ગોપી તલાટી : વીડિયો વાયરલ

વડોદરા, તા.4 : કેડરબેઝ ગણાતી પાર્ટી એવી ભાજપમાં સભ્યતા ભુલાઈ હોય તેવો એક કિસ્સો સામે આવ્યો છે. વડોદરા શહેર ભાજપ કાર્યાલય ખાતે આજે શનિવારે એક બાજુ પ્રમુખ પદ માટેના ઉમેદવારી પત્રો ભરવાની પ્રક્રિયા ચાલતી હતી ત્યારે બીજી બાજુ ભાજપના પૂર્વ ડેપ્યુટી મેયર સુનિતા શુક્લ અને પૂર્વ કોર્પોરેટર ગોપી તલાટી વચ્ચે ચડભડ થઈ હતી. આ અંગેનો વીડિયો પણ સોશિયલ મીડિયામાં વાયરલ થયો હતો.

પૂર્વ ડેપ્યુટી મેયર સુનિતા શુક્લનો આક્ષેપ છે કે, ગોપી તલાટીએ મહિલા માટે અયોગ્ય ટિપ્પણી કરી હતી, જે નિવેદન મુદ્દે બન્ને વચ્ચે તૂ તૂ મૈં મૈં... થઈ હતી. તેમણે ઉમેર્યું હતું કે, પૂર્વ કોર્પોરેટર દ્વારા મહિલા વિશે બેહુદું નિવેદન કર્યું છે. તેનો પુરાવો અમારી પાસે છે. જે અંગે હાલના શહેર પ્રમુખ સાથે અને ત્યારબાદ પ્રદેશ સમિતિ સમક્ષ પણ આ અંગે રજૂઆત કરીશું. આવાં નિવેદન કરી પૂર્વ કોર્પોરેટર મહિલાઓને બદનામ કરવાનો પ્રયત્ન કરી રહ્યા છે.

આ મુદ્દે ગોપી તલાટીએ કહ્યું હતું કે, ‘ભારતીય જનતા પાર્ટી મહિલા આગેવાનોને રાજનીતિમાં આગળ લાવવા પ્રાધાન્ય આપી રહ્યું છે ત્યારે આવું કોઈ નિવેદન કોઈપણ કાર્યકર્તા કરી શકે જ નહીં, કોઈ મહિલા આગેવાન માટે મેં કોઈ નિવેદન કર્યું નથી તેમ છતાં પૂર્વ ડેપ્યુટી મેયર મને બદનામ કરવા માટે ખોટી રીતના આક્ષેપ કરી રહ્યાં છે.’