(ફૂલછાબ ન્યુઝ)
અમદાવાદ,
તા.8: ગુજરાત વિધાનસભાના ચોમાસું સત્રની તારીખોની જાહેરાત કરવામાં આવી છે. આ સત્ર
8, 9 અને 10 સપ્ટેમ્બર એમ ત્રણ દિવસ ચાલશે. આ ત્રણ દિવસના ટૂંકાગાળાના સત્રમાં વિવિધ
પ્રશ્નો આવરી લેવામાં આવશે. રાજ્યપાલ આચાર્ય દેવવ્રત દ્વારા વિધાનસભાના સાતમા સત્રનું
આહવાન કરવામાં આવ્યું છે.
સત્ર
દરમિયાન ધારાસભ્યો 20 ઓગસ્ટ સુધી તારાંકિત પ્રશ્નોની સૂચના ઓનલાઈન તેમજ પ્રત્યક્ષ એમ
બંને પદ્ધતિથી આપી શકશે. 3 દિવસ દરમિયાન સરકારી કામકાજમાં જીએસટી સુધારા વિધેયક તેમજ
ફેક્ટરી સુધારા વિધેયક આ બન્ને વટહુકમ પણ વિધાનસભામાં રજૂ થશે. જો સરકાર પાસે અન્ય
કોઈ બાકીનું કામકાજ હશે તો તે પણ રજૂ થતા આગળ લેવામાં આવશે. કામકાજ સલાહકાર સમિતિની
મિટિંગ 6 સપ્ટેમ્બરના રોજ બોલાવવામાં આવશે. જેમાં બાકીના વિગતવાર કામોની ચર્ચા કરવામાં
આવશે. આ અંગેની માહિતી વિધાનસભા અધ્યક્ષ શંકર ચૌધરી દ્વારા આપવામાં આવી હતી. ગુજરાત
વિધાનસભા દ્વારા ચોમાસું સત્ર સંબંધિત જાહેરનામું પણ બહાર પાડવામાં આવ્યું છે. આ સત્રમાં
વિવિધ સરકારી વિધેયકો અને રાજ્યના મહત્ત્વના મુદ્દાઓ પર ચર્ચા થવાની શક્યતા છે.
