દારૂની 15 હજાર બોટલ, 2 હજાર
બિયરના ટીન સહિત કુલ રૂ.53.18 લાખનો મુદ્દામાલ કબજે કરાયો : એક શખસને ઝડપી લેવાયો
ઉમરાળા, તા.9 : ઉમરાળા હાઇ-વે
પર ટેન્કરમાંથી દારૂનો જંગી જથ્થો ઝડપી પાડવામાં આવ્યો હતો. એલસીબીએ બાતમીના આધારે
વોચ ગોઠવી વલભીપુરથી ઉમરાળા તરફ આવી રહેલા ટેન્કરની તલાસી લેતા તેમાંથી વિદેશી દારૂની
15 હજાર બોટલ તેમજ 2 હજાર બિયરના ટીન સહિત કુલ રૂ.53 લાખનો મુદ્દામાલ કબજે કર્યો હતો.
આ અંગે પ્રાપ્ત વિગત મુજબ ભાવનગર
એલસીબી પોલીસનો સ્ટાફ પેટ્રાલિંગમાં હતો. ત્યારે બાતમી મળી હતી કે એક સફેદ કલરનું ટેન્કર
નં. એચઆર 65 એ-0497 ઉમરાળા આવી રહ્યું છે. જેમાં વિદેશી દારૂનો જથ્થો છે. બાતમીના આધારે
પોલીસે હાઇ-વે પર વોચ ગોઠવી ટેન્કરને રોકી તેની તલાશી લેતા તેમાંથી વિદેશી દારૂનો જંગી
જથ્થો મળી આવ્યો હતો. ટેન્કરમાંથી જુદી-જુદી બ્રાન્ડની કુલ 15108 બોટલ, 2016 નંગ બિયરના
ટીન, 3 મોબાઈલ તેમજ ટેન્કર મળી કુલ રૂ.53,18,240નો મુદ્દામાલ કબજે કરી કાયદેસરની કાર્યવાહી
હાથ ધરવામાં આવી હતી.
આ બનાવમાં રાજસ્થાનના કરનારામ
જયરૂપારામ કાલર (ઉ.વ.22)ની ધરપકડ કરવામાં આવી હતી. જ્યારે રાજેશ આશુરામ રાણા (હરિયાણા),
રાજૂ જાટ (રાજસ્થાન) અને દારૂનો જથ્થો લેનાર પાર્ટીને વોન્ટેડ જાહેર કરવામાં આવ્યા
હતા. આ કાર્યવાહીમાં એલસીબી પીએસઆઇ પી.ડી ઝાલા, જયદાન લાંગાવદરા, બીજલ કરવટિયા, હરિશ્ચંદ્રાસિંહ,
ફાલ્ગુનાસિંહ ગોહિલ, શૈલેષ ચાવડા જોડાયા હતા.
